عزيزي وكيل السيارات: الجزء الأول

tegeta

كتبت هذه المقاله، الموجهة لوكلاء السيارات، بعد مشاهدة مقطع فيديو قصير يقوم ببطولته عملاء وكالة سيارات دون علمهم. وسأرجع لتفاصيل الفيديو لاحقاً بعد ان اسرد لكم حالات حصلت لي ولبعض المعارف مع بعض وكلاء السيارات في منطقتنا تعكس بعض معاناة العملاء.

الحالة الأولى

قبل ستة أشهر اخذت سيارة الاهل، ميني فان، للوكاله لوجود عطل في المحرك. وعند تسليم السيارة بالورشة الجديدة لهم اخبروني ان السيارة تحتاج إلى ثلاث أسابيع بسبب زحمة السيارات وقلة العماله! وبما اني أكره الذهاب للورش، اضطريت للموافقة.

بعد ثلاثة اسابيع كلمت الوكالة أكثر من مره ولم يجاوبني أحد. وبحكم طبيعة عملي وموقع الورشة البعيد تركت السيارة لأسبوعين إضافيين. وطوال الفترة كنت اقوم بالاتصال على الوكيل يومياً، ولكن لا حياة لمن تنادي.

وبعد مرور خمسة أسابيع، وبدون أي خبر من الوكيل، ذهبت لإستلام السيارة. تفاجأت بأنالسيارة كانت تقف بنفس المكان الذي تركتها فيه داخل الورشة مغطاة بالغبار ولم يلمسها أحد.

دخلت على مكتب المسؤول “وبراسي شرّ” وتفاجأت بوجود أربعة أشخاص عنده يصرخون بصوت عالي محتجين على الاحتفاظ بسياراتهم لفترة طويلة دون تصليح. عندها عرفت ان المشادة لن تجلب نتيجة وطلبت منهم أخذ السيارة لإصلاحها بأي ورشة عادية.

المضحك والوقح في الأمر، انهم طلبوا مني كتابة تعهد بإخلاء مسؤولية الوكالة وأنني ارغب بأخذ السيارة خارج الورشة بحالتها على مسؤوليتي الشخصية !

ومع أنني من المعجبين جداً بسيارات الشركة الكورية التي تستوحي تصميم سياراتها من شركة أوروبية. إلا انني عاهدت نفسي أن لا اشتري أي سيارة منهم مستقبلاً مهما عجبتني.

الحالة الثانية

قبل سنتين، وبعد مرور أسابيع قليله على شراء أحد الأصدقاء سيارة جديدة. قرأت بمواقع الانترنت ان ثاني أكبر شركة أمريكية تستدعي نفس موديل سيارة صديقي لوجود مشكلة كهربائية تتسبب بإطفاء كل شيء الكتروني بالسيارة بما فيهم المحرك.

فبلغت صديقي بالمعلومة لأخذ الحيطه والاتصال بالوكيل، ولكنه لم يهتم معللاً: “طالما السيارة ما جاها شي للحين فالأمور زينه”.

وفي صباح إحدى الأيام واجه صعوبه بتشغيل سيارته (وكأن البطارية ضعيفة). وبعد عدة محاولات، اشتغلت السيارة وقرر الإتجاه للوكيل مباشرة. وهناك وجد ثلاث سيارات لنفس الموديل وبنفس المشكلة جاءت قبله لمقر الوكالة على سطحات.

فوجّه سؤال للوكيل اذا كانت المشكلة تتعلق بالعطل الذي اعلنت عنه الشركة الأم قبل فترة. وكان جوابهم بإنكار وجود أي مشكلة مصنعية تخص الموديل وأكدوا أن سيارته تعاني فقط من خلل قطعه صغيرة تحتاج للتغيير بقيمة 550 ريال تتكفل فيها الوكالة !

ما المشكلة من الاعتراف بوجود خلل مصنعي؟ العطل وارد في كل شيء والمصداقية ستزيد إحترام العميل لكم.

يتبع، موقف ثالث غريب مع وكالة سيارات يابانية فاخرة بالفيديو
 

عن الكاتب

أقرأ بشغف عن كل مايتعلق بعالم السيارات .... عاشق للسيارات الرياضية والكلاسيكية، وجميع كتاباتي وآرائي من منظور شخصي .... يمكنك متابعتي والتواصل معي عبر تويتر: @Aldubayan1

31 تعليقات

  1. غير معروف

    الله لا يوفقهم.. والله صار نفس الواحد يصير وكيل لشركة سيارات.. عشان أمسك السوق وأخلي هالرابيش نشووف مين يشتري منهم!!

     
  2. عبدالرحمن تاج

    يا اخي دحين صح في مشاكل ولاكن حتتحسن الامور غصبن عنهم بسبب الوزارة اي احد عندو مشكلة يروح الوزارة يبلغ ولو كثرت على نفس الوكالة يحاسب ويشهر

     
  3. اذا غاب البس , العب يا فار .

     
  4. هذي الامثله تهون

     
  5. انا قبل سنه طلبت لي بورش وصلت بعد ٤ شهور وهذا طبيعي مثل ما الكل عارف ، لكن المشكلة انهم سلموني السيارة بعد ماجات ب شهر ونص بحجه ان مافي استمارات او لوحات ، وبعدها خذت السياره واكتشفت انهم ما عطوني ورقة التامين وصرت اطارد وياهم اما المعقب مسافر او مش موجود او اجازه لين ما زهقت وتركتهم والتامين كم شهر وينتهي اصلا وهو للحين عندهم هههههه ! لكن الحمدلله ما احتجته ، والتشييك حدث ولا حرج تغيير الزيت قعدت يومين ونص، صار كل شغلي في وكالة البحرين وراسي مرتااح ، المشكلة ماهي من السيارات المشكلة من الوكلاء عندنا فالسعودية مشوهين سمعه اكبر واصغر شركات السيارات حسبي الله عليهم

     
  6. ليه عدم الوضوح بالطرح؟ الى متى وحنا ننظلم ونزعل ونشتكي وبالاخير مانذكر اسم الشركه واسم الوكيل ونستر عليه؟ عطنا الاسم وشهر فيه! دام هالشي صدر منهم فهم جابوها لانفسهم ونبه اخوانك المسلمين عنهم وعن اي فرع صيانه بالضبط، قلها هل تقصد هونداي ولا كيا؟ فضفض بوضوحيه اكثر رجاءا.

     
    1. شيخ المعارض

      ياخي تصدق ذكرت الجرايد لما تقول القبض على عصابة خطيره وبعدين تحط صور لهم من جهة الظهر ؟!!!
      وش ذالخبال ؟؟
      من جد وش ابغى بظهره يوم انك مصوره لي ؟
      ياتحط صورة وجهه واسمه والا لاتنشر الخبر

      والا اذا قالوا لك القبض على وافذ من جنسيه اسيويه او عربية !!
      طيب قل الجنسيه وش المشكله ؟

       
  7. شكراً أخ مهند على القصة لكنها دون جدوى طالما تستمر على الوكيل !

    أعتقد من المفيد أن توضح اسم الوكيل والسيارة والخلل المصنع،،، مع الشكر لك

     
  8. سؤال آخر هل تقدمت بشكوى ضد الوكيل لدى وزارة التجارة؟

     
  9. اخوي انا حصلت لي قصة قبل امس في وكالة نيسان الحمراني
    اذا حاب تنشرها ابشر

     
  10. أبوالمنذر

    فيه بعض الوكالات وأضرب مثال مثل الوعلان

    السيارات هونداي صار عليها أقبل أكثر من قبل وعدد المستخدمين كثر وإلى الأن لا يوجد فرع يعمل صيانة للضمان إلا الفرع الرئسي الصغير الذي لا يستطيع تلبيت طلبات العميل وهنا الكارثة. أصبح أذا وجد شيء عيب مصنعين فأنه لزم يأخذ موعد بعد شهر وتقعد السيارة عندهم أسبوعين أقل شيء وحتى لو كانت السيارة لا تشتغل

    فهناك مشكلة نقص في الصيانة وأما أذا أردة الفحص الدولي (الذي بأسعار غالية عن غيرة) فهو موجود في كل مكان أما تريد صيانة على حساب الضمان فهم يقولون ماعندك إلا الفرع الرئسي

    وفيه وكالة كثر مثل هذا النظام وهذا مجرد مثال

    وفيه مشكلة ثانية أن العميل لا يسمح له دخول الصيانة ومعرفة ماذا يفعلون بسيارة وعدم الشفافية وعدم معرفة ماهي كانت المشكلة وشغل بطيء

     
  11. اكيد الوكيل الاول الناغي حق هونداي لانهم دايما مواعيدهم كذب وما يمسكون سيارتك الا يوم ترحلهم عشرة مرات
    لا بارك الله فيهم

     
  12. عذر اقبح من ذنب ………. زحمه السيارات وقله العماله … شركات كبيره ووكلاء مطفحيين بالفلوس …. خرجيين مكانيكا وكهرباء قد شعر راس الوكيل …. صعبه يفتح ورشه للوكاله ويوظف المتخرجين ..؟؟

    ولا يستنى تأشيرات دخول (( صديق انا سوي كويس 100 100 ))

    ماقول غير حسبي الله عليهم ولا يبارك لهم في تجارتهم لانهم ظلموا الناس واشقوهم … والرسول صلى الله عليه وسلم امر بتيسيير امور المسلم والتفريج عن همه … وفي النهايه نحن ما نطلب اكثر من حقنا

     
    1. عمرو مصطفى

      كلامك زين مرة فعلا بس نقطة (( صديق انا سوي كويس 100 100 )) ياخي احترم الاجانب الي تكرف 8 ساعات في اليوم وانت قاعد في بيتك نايم.

       
  13. مــــهند الدبيــــــان

    شاكر للجميع مروركم وتعليقكم على المقال
    الأخ Fact:
    ما ذكرت الأسماء لسبب واحد فقط، بصراحه حبيت اشوف من هو أول قارئ يقدر يقرأ ما بين السطور لمعرفة اسم الوكيل لوجود دلالات واااااااااضحة في الموضوع على كل وكالة
    الأخ أبن أبيه:
    صراحه ما حتى فكرت بتقديم شكوى، لأن بكل الأحوال اتوقع اني راح انتظر شهور عشان تنحل المشكلة وبنفس الوقت ما فيه آليه ممكن الواحد يتبعها عشان يشتكي. وحكاية البس ثوبك وروح للوزارة اشتكي وتابع الشكوى عندهم، هذي ما عندي وقت لها أبداً.
    الأخ bazooka:
    يا ليت تشاركنا بقصتك هنا حتى يستفيد الجميع
    تحياتي،،،

     
    1. الشكوى عن طريق التلفون واستجابتهم عاليه خلال يوم واحد استجابوا لبلاغي على العيسائي وكيل متسوبيشي … جربها وتراها وانت في بمكانك .. أأكد عليك حبذا لو تذكر لنا وش اسم الوكيل .. خاصه ان وزارة التجاره بنفسها صارت تشهر فيهم 🙂

      رقم وزارة التجارة

      8001241616

       
      1. الوكاله الكوريه اللي تاخذ تصاميم اوروبيه هيا كيا ،،،، انا الحمد لله سيارتي اوبتيما ٢٠١٢ وامورها طيبه بس الجبر مستهتر فينا بشكل خيالي

         
  14. ياعمي صيانة الوكاله للسياره اكبر كذبه عندنا ، يغيرون لك قطع السياره وهي لم تستهلك بعد وياخذون فلوسها دبل بحجة تغييرها
    بالنسبه لي سحبت على الوكاله من صيانة ٥٠٠٠ كيلو وصرت اسوي لها صيانه برا عند بترومين والورش النظيفه
    ونعرف وش اللي مفروض يتغير ومتى يتغير ..! ووفرت مبالغ كبيره بدال ماادفعها على صيانه فاضيه
    وحمدلله سيارتي لحد الحين صار لها سنتين واكثر والوضع اوكي ويمكن احسن من سيارات سوو لها صيانه بالوكاله ..!

     
  15. أكيد الوكاله هي kia والسبب قولك إن التصميم أوروبي . . . ومعروف إنهم مايردون عالتليفون والشي اللي تقول لهم صلحهو تتفاجأ إنهم ماصلحوه

    مالومك والله لكن الشهادة لله سياراتاهم تاخذ العقل تهبل تجنن على قولة البنات وماتمل من شوفتها وإن شاء الله الوكيل يتحسن في المستقبل

     
  16. شيخ المعارض

    المفروض الواحد يتعلم وش الاشياء اللي لازم لها تغيير وفترات تغييرها ويصير يغيرها برا الوكالة
    بتستفيد انها اسرع بفارق رهيب عن الوكالة
    وايضا ارخص بأرقام كبيرة جدا جدا
    ثالث شي تشوف الشغل قدام عينك لان بعض الوكالات ترفض انك تدخل تشوف الشغل
    رابع شي لاتخاف ماراح يروح الضمان عليك اذا سويت الصيانه عند محل محترم وله سمعته

     
  17. يعطيك العافية اخوي مهند,,

    اتوقع الكلام ينطبق على جميع الوكلاء من جميل الى اصغر وكيل, ومشكلة التأخير هذه اتوقع من ابسط المشاكل عندهم، عندك الاسعار الخرافيه وتغيير القطع على جدول الصيانه من غير مراعاة مدى استهلاك القطعه ومثلها الكثير..

    ويا ليتك ذكرت تفاصيل مشاكل سياراتك واسم الوكيل ليس تكذيبا لك ولكن للتوضيح و يكون المناقشه عادله..

    شكرا

     
  18. انا معاي فورد تورس 2011 وفي منتصف شعبان انفجرت المكينة وانا امشي بشكل طبيعي وبدون اصوات تنبيه او خلل
    السيارة ماشية 61 الف……اخذت السيارة للوكالة وقالو انهم راح يشيكون على المشكلة….بعد اسبوعين قالو ان عندك عيب صناعي في السلندر منفجر وراح يتغير…..طبعاً تهاوشت مع الوكالة…مدير الصيانة والمدير الاقليمي ووكيل الشرق الاوسط في الامارات وما نفع الكلام….شي غير معقول
    طبعاً مو راضين يستبدلون الموتر او مكينة جديدة
    السيارة فالوكالة من تاريخ 27/6/2013 وحتى اليوم
    علماً اني تواصل مع وزارة التجارة ولا حياة لمن تنادي

     
    1. شيخ المعارض

      تواصل مع الوزير الربيعه بتويتر وان شاء الله مايقصر

       
  19. ياناس والله الوزارة ماهي مقصرة ، خل عنك الكسل أنت واياه وتوقعاتك السابقة ودقوا عالوزارة وشوفوا كيف التفاعل واذا ما نفع ( وهذا نادر ) منشن الوزير الربيعة على تويتر وان شاء الله مو مقصر
    وهذا الانسان اعتبره المسؤول الحكومي الوحيد اللي قد الامانة ..
    تخيلوا امس نازل هو بنفسه ومعه شخص واحد فقط ورايحين بانوراما مول يتاكدون بانفسهم ان مافي مخالفات أو زيادة اسعار من المحلات قبل العيد

     
    1. اتفق معك وبقوة
      هذا الانسان يستحق وسام الملك عبدالعزيز
      مهو اللحوج الي بمجلس الشورى لا بارك الله فيهم وجيه النكبة
      نكبوا البلد الله لا يهنيهم بريال واحد ياخذونه من مجلس الشورى
      وبكل وقاحة يبون وسام الملك عبدالعزيز

       
  20. محمد سعيد

    ما كامل الا ربك..بس ما العيب في الاعتراف بالخطأ المصنعي..ترا ماهو عيب لاننا بشر ومافي احد بعيد عن الغلط.

     
  21. قلنا اسم الوكيل طيب وش استفدنا الحين !!

     
  22. ما ادري الي متى هالتجار ما يخافون الله هم والموظفين الي تحتهم
    وبعدين مع الفكر التعسفي هذا؟
    انا اشكر وزير التجارة توفيق الربيعة على دق خشم الوكالة الي تصبغ ومعروفة ومايحتاج

    واشكره على اجبار الشركات الي ماخه وكالات اكبر من حجمها على اصلاح الاعطال رغم انوفهم

    شكرا توفيق الربيعة
    جعل من رباك مثواه الجنة ياحي ياقيوم

     
  23. يعني للأسف الشديد مافيه ولا وكالة وحدة تبيض الوجه !!

     
  24. لماذا لا تذكر اسم الشركه ووكالتها وتفاصيل عنهم !
    كانك تدافع عنهم وراضي منهم

     
  25. الحالة الاولة المقصود فيها كيا
    و الحالة الثانية فورد
    🙂

     

‎إضافة تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

ارفع صورة مع تعليقك



‎مقالات ذات صلة